| na's profile由此路進 >>>BlogLists |  Tools  Help |
|
January 30 恭喜發財每逢新年, "恭喜發財"呢句話, 不絕於耳, 見人第一句, 總係呢一句.........
na向來唔係"好好口"同世故的人, 所以拜年對na係一個艱巨任務, 尷尷尬尬唔知講咩好, 感覺好造作! 有時都覺得, 過時過節, 俾兩句"老黎"說話過人聽下啦, 但好似早幾年, 經濟唔多好, 你又唔知人家想唔想派利是喎, 雖然逗唔逗利是na真係覺得好閒, 但主動同人講一大串賀年大吉大利四字辭, 人家無可避免會拿出紅封包, na覺得拜年似做山賊, 搶人錢咁!! 過年無謂要人為難唔高興嘛, 所以na更會保持緘默........
不過近兩年, na拜年總能搭上咀, 可能做得交際花多, 正如美大寶講, na"犀利"咗!
借機表現下! 祝大家新年好運, 心想事成, 福星高照, 大展鴻圖, 事事順景, 龍馬精神, 出入平安, 路路亨通, 人工暴脹, 花開富貴, 人月兩圓, 要仔生仔, 要女生女, 添丁發財, 福到運到, 國泰民安, 早日普選.........
na一片真心, 絕對唔"虛"!!
January 27 阿茂整餅只係相隔十幾個鐘, 再打開個Blog, 竟然唔同咗樣, 相當忟憎!!
尤其係網誌內容, 字體忽然細咗, 重新編輯, 發現都係同一字型, 但點解顯示會細咗?? 於是放大D, 但又覺得大得滯, 都唔係原先咁樣!!
 最憎人郁我D嘢(雖然我都知喺呢個地盤唔到我話事), 可以話na無聊, 事實呢方面我都幾固執, 原先係咁就要咁, 樣樣嘢都要有條有理嘛! 改咗又唔係好咗, 咁就唔算改善啦........激死!! 我要諗辦法攪番掂佢!
January 23 保外就醫na返到香港了!
連日來關心na的友好/同事/領導人都在責怪na不在"確診"後馬上班師回朝, 有"大人"更有點動氣, 怪na不愛惜自己.......能夠有人這麼疼我, 真感動! 但同時也感覺不安樂! 不返港猶如做了錯事.......叫人擔心, 不好過!!
其實na沒逞強, 也非工作狂至此, 只是真的覺得沒大礙, 才多留幾天. na真的自我感覺良好, 實在一個人自己有事沒事, 有"幾大件事", 心裡會有數, 就如患重病的人, 會感覺自己幾時"去"一樣........na已沒那麼痛, 雖然睡得還不太好, 但呼吸大力點已不覺難受.
未來兩天, na的節目將是看醫生, 大家放心!!
January 17 容易受傷的女人早說零六年低處未見低......踏入新一年未夠十天, 就摔了一交, 骨折!!
那天腳踏冰上, 一不小心就整個人跣倒, 瞓到直一直, 右手踭先鋤落地, 沒有斷手, 只是瘀了一大片, 以為無事, 怎知原來傷及肋骨......too bad! 在哈薩克還每天會行會走會扑咪, 只是漸漸發現右胸下方隱隱作痛! 回到北京, 痛楚未除. 還越來越痛! 每晚上床睡覺, 一向右側身就痛得"彈開"; 不能深呼吸; 打個噴嚏更幾乎"散架", 眼淚直標.......
硬著頭皮看醫生, 經一輪檢查, 又照X-RAY, 醫生說, 右邊第九條肋骨骨折, 是骨頭與軟骨交接的部份骨折了! 醫生還說摸到有點凸出, na還以為只是撞傷腫了......常以為斷骨, 骨頭就會插出來, 所以想也未想過會是骨折!! 醫生說, 若第十一及第十二條肋骨骨折, 可能會插傷肝臟, na幸而沒有傷及內臟, 骨折部位四星期後會慢慢愈合, 不用甚麼治療, 只要小心別再碰傷就可以!!
na仍然會行會走會扑咪, 一切如常! 只是發現, na這個年紀的婦女, 原來真的會骨質疏鬆, 容易骨折.......還以為自己很"硬淨", 其實多脆弱!!
January 16 凍到僵中計! 原以為領導人臨急臨忙請大家到哈薩克有甚麼話要說, 怎知道, 還不是那個口徑, 也沒有提問機會, 聽過就算, 唉! 不過也好, 否則也沒有機會感受零下三十多度的滋味, 相當過癮!
那天飛機降落阿斯塔納機場前, 機上廣播說, 地面溫度是零下三十二度, 大家心裡都涼了一截, 但又很期待.......拿了行李出機場, 周圍白濛濛一片, 彷彿沒有其他顏色. 雪很厚, 有人"插進"雪堆中, 積雪到膝蓋, 厲害!! 還有感覺呼吸怪怪的, 好像鼻腔凝結了, 一呼一吸像有東西"抓"住, 當發現有人的眼睫毛結了霜, 變得像塗上白色mascara, 很聖誕派對裝扮的樣子, 就知道, 鼻孔發生甚麼事了.......
到了酒店, 對面廣場有個大型溫度計, 記得半年前夏天來時, 顯示著37度, 熱得頭昏腦脹; 此時此刻, 卻是-26度, 重臨舊地, 氣溫竟相差六十多度.......
此後幾天, na總是從酒店步行到領導人下塌的酒店, 約十分鐘路程. 每天出門前, na都要先把自己"包好", 否則怎能投進"大雪櫃"去?! 由於沒有準備飛虎隊面罩, 只能拉高頸巾把臉蓋住, 氣呼出來, 落在頸巾上, 馬上就結成霜, 還有na的眼鏡, 因為沾上呼出來的水氣, 也結霜了, 不得不"盲中中"上路.......路途上, na把手從手套拿出來拍拍照, 不消一分鐘, 手掌都僵硬, 沒有知覺, 深怕指頭一屈就斷, 馬上又得帶回手套; 還有穿著的羽絨(na打孖著上兩件), 亦結了霜, 邊行邊發出"卜卜脆"的聲響, 好像穿上膠雨衣一樣, 好"得意"!!
基本上, 把自己"包好", 身上感覺還是很暖和的, 尤其na有內置羽絨, 團團脂肪圍住........只是外露的地方會感覺難受一點, 不過在戶外時間不長, 還能忍受, 反覺過癮! 當然, 若這次是採訪突發新聞, 在這冰天雪地熬, 可能會凍僵~~~~~~
回到北京, 感覺很"溫暖", 才零下四度!! January 07 煩到嘔煩足一個禮拜, 真係煩到嘔!
元旦日, 認真唔好日! 收到公司通知, 一星期後去哈薩克, 跟隨副主席參加哈薩克總統就職.......外交部臨時臨急先邀請大家採訪, 即係話, 領導人可能想找人傳話! 大家自然要充當recorder & decoder, 而噩夢亦隨之展開.........
每次跟領導人出訪, 採訪/報道基本沒有太大困難, 只要有留意新聞, 加點常識, 問題唔大. 最頭痛仲係出發前設計行程, 點飛法, book酒店, 辦簽証, 兌外幣......電視台仲要租車找翻譯, 未出發, 人已殘!
今次雖然只飛一個地方, 看似簡單, 但目的地係哈薩克首都阿斯塔納, 可能大家都唔知喺邊! 有行家就以為哈薩克在中國境內; na同事就以為喺哈爾濱附近......實情哈薩克(Kazakhstan)係中亞最大國家, 前蘇聯加盟共和國, 同新疆接壤, 以前首都在阿拉木圖(Almaty), 早陣子遷都阿斯塔納(Astana), 咁山卡啦, 就知要飛去幾煩!! 時間仲要咁急!!
首先, 當然要睇下點飛!
當知道可以在北京出發, 飛阿拉木圖, 再轉飛阿斯塔納, 仲以為好筍, 起碼唔駛飛俄羅斯兜一個圈過去, 點知, 又唔係日日有機喎! 去程有, 但回程無, 一係滯留兩日先返, 一係諗其他走線, 內地agent又唔夠靈活, 咁去就要咁返, 唔曉轉膊, 乜都話做唔到, 仲未計假期搵唔到人(星期一二仲係內地新年假期), 終於大家都要搵番香港agent, 但香港agent又無代理阿斯塔納航空, 出唔到機票, 只知去程好full, 唉! 但香港agent起碼可以度其他走線. 曾經出現過的方案, 包括回程經烏魯木齊, 法蘭克福, 與及首爾(全部都係先飛阿拉木圖, 首都其實得個殼), 再飛返北京, 不過, 好貴!! 而且要北京香港兩邊出機票, 相當麻煩!
呢個"艱難時刻", 本台最高領導忽然介入, 指示寧可滯留兩日, 一鎚定音! 事情變得簡單, 只係要搵機位. 幸好na早在網上hold咗位(當時唔知有無用, hold咗先算), 於是直接找航空公司出票, 呢間航空公司都相當得! 簡直海鮮價, na最早確定出票, 價錢七千二百幾; 第二位行家緊隨出票, 承惠八千七; 之後再去, 經已跳到九千三........至於姊妹台, 就堅持經首爾回航, 決不滯留, 真富貴!
攪機票之餘, 仲要book酒店, 唉! 阿斯塔納話明得個殼, 有幾多間似樣酒店, 五隻手指數哂! 總統就職咁大件事, 多國政要大駕光臨, 官方自然hold起哂D房. 追足一個星期, 家下只得na有房. na搵番半年前去做嘢時住過間酒店, 可能na夠咿俄, 同俄羅斯嬌娃啱傾, 最終na獲配一間單人房, 當na從傳真機收到酒店的confirmation, 真係有點感動........明晚大軍就出發, 其他人仲未有房, 或許大家要來一次大被同眠!!
至於簽証, 都係今日先到手, 無奈! 哈薩克駐華使館簽証處平時都經已只開一三五, 呢個星期因為新年, 竟然放足四日假, 星期五先開門.......一早大家就去排隊, 話知你有外交部照會, 一樣要喺零下二度低下, 企喺簽証處外面吹風! 外國成日同中國講人權, 但就要中國人企街等辦簽証, 間間外國駐華使館都係咁, 呢D唔知咩人權? 辦個簽証好似乞咁! 喺北京攪過幾次簽証, 真係唔多唔少感受到內地人出國難的辛酸......仲要俾八百幾蚊, 又要去銀行交錢, 攪足三個幾鐘, 下晝又要再去排隊攞証, 頂!
卡啦時間去銀行諗住換美金做水腳, 點知忘記外匯管制.......銀行職員話, 若果真係要換錢, 要交公司登記, 收支証明, 仲有唔知咩一大堆, 真係唔知點俾你, 搵得齊, 你都閂門啦, 於是只好放棄, 尋求其他方法撲水.......
係咪煩到嘔??
哈薩克家下仲好凍~~~~早兩日有大風雪, 見過零下三十三度, 今日"回暖", 但都有零下廿三度, 禦寒亦成為一個艱巨任務, 希望唔會凍僵!!
January 01 一個人的新年沖完涼, 已踏入零六年.......
na寧願一個人, 也不想柴娃娃無無聊, 甚麼"過年點都要搵D嘢攪", 對na, 不適用.......
除了因為工作不在香港, 這麼多年的大除夕, na總在家, na要的是寧靜.......而且在家也挺有氣氛! na的家, 面向貨櫃碼頭, 每逢踏入零時, 除了街上的車響號, 碼頭和海港上的船都會鳴笛. 即使你沒有看鐘, 只要聽到鳴笛聲, 就知道, 新一年來了!! 小時候, 還愛站在窗前邊聽邊看, 看船員"偷雞"放煙花........
剛吃過"去年"剩下來的飯菜, 無所謂啦! 人有甚麼不是從"過去"帶到"今天".........所以, 才會有幾生修來, 也會悔不當初.........
零四年叫na傷感; 零五年以為會好, 怎知又有另一番衝擊, 好像甚麼也不能捉緊在手, 甚麼都非你可掌握; 踏入零六年, 感覺可能低處未見低......anyway, 放馬過來!!
|
|
|
