| na's profile由此路進 >>>BlogLists |  Tools  Help |
|
December 31 下雪了終於下雪了!!!
吽足幾日, 陰陰濕濕, 份外凍.......今朝雞啼咁早都未見有雪, 以為又要再等, 事關通常都係半夜或者臨天光先落雪, 點知聽緊大事回顧的時候, 收到某君SMS, 即刻撲出露台睇, 露台經已鋪上一層雪, 一片片雪花, 仲好清楚在露台地上見到, 好靚! 外面開始白濛濛, 雪繼續落........
我諗我要出去行下喇!! 好戲連場剛做完"交際花"回來! 是晚港澳辦請食晚飯兼睇戲, 張藝謀套[千里走單騎], 套戲好唔好睇先唔好講, 因為戲肉喺餐飯度........ 由於塞車, 好不容易先等齊人(na都遲到, 塞咗兩粒鐘, 落地想嘔), 齊人領導當然要講話, 唔係點開飯!! 領導先來一堆客套話, 甚麼北京塞車, 成年無同大家聚頭, 今晚粵菜希望啱胃口.......大家都在陪笑著, 包括主家席上的na, 真係好虛! 接著領導忽然說: "為要賠罪(都唔記得佢因乜要賠罪), 我來對最近香港的事來個短評吧!" 一眾交際花交際草登時你眼望我眼, 耳仔當然經已本能地豎起........(以下普通話演譯)
領導問, 有沒有留意, 近日香港的報章都把民主派寫成"反對派"? 我看, 這個也是對的! 領導說, 反對派是曾蔭權的說法, 其實說得很恰當! 因為叫他們做民主派"不準確"! 他們自稱"民主鬥士", 但面對一個可以令民主邁出一大步的方案都投反對票, 給否決了, 根本不配帶上"民主的桂冠"........他們還說, 這次不會影響跟中央的溝通, 看來是"一廂情願"吧! 溝通是要講誠意, 要雙向亙動的, 中央都已釋出善意, 像副主席訪問香港, 都安排所有六十位立法會議員出席晚宴, 又安排他們到廣東考察, 中央做了那麼多, 但他們卻甚麼也沒有做, 如果說這次不影響溝通, "那是侮辱了中央的智慧"!!! 接著他還說, 希望這番話, 沒有倒大家胃口.......你話呢??
無諗過來食餐飯, 會聽到"真心話"! 沒有筆錄, 只能死記, 幸好素有訓練, 平時錄音都唔愛番聽, 知道邊個係bite就得啦!! 在data save的過程中, na想起, 煲呔特首過去兩日述職, 兩次記者會講到民主派同中央溝通, 都多番強調"廿一號的事發生咗, 唔可以當咩事都無發生過", 原來佢真係掌握到中央意旨........
食食下, 忽然某記者彈起身, 向尾圍方向走去(筵開三席, 一字排開). na心想, 此君極可能係想扑咪! 至少想"有米落鑊", quote得都好.......真係咪傻啦! 話咗只係俾大家當背景資料, 唔可以作報道, 點會俾你quote, 俾你扑? 如果"出街", 就唔係講呢番話啦, 真係!! 果然無幾耐, 新聞司同事就走到領導身邊咬耳仔, 只見坐正na對面的領導不停搖頭, 預咗啦!
之後, 大家仲有討論乜嘢係"深層次矛盾", 唔知係咪剛才某記者的舉動令領導有戒心, 定係我地真係誤會咗? 領導話, 聽到有人將呢句話演譯為政治矛盾覺得好好笑, 佢話係人都知係講經濟問題喎, 睇吓上文下理........老實講, 我仍然主觀覺得唔會同政治無關, 至少係語帶雙關!!
話時話, 呢兩個星期, 飯局真係何其多, 除咗部門的聖誕新年聯歡, 還有一堆"交心聚會", 好似某君就曾一星期請大家食兩次午飯, 於是知道原來政改期間上演過"無間道"; 因何香港的良心變成內地的出牆紅杏; 阿爺因乜咁順攤俾煲呔玩政改.........當然, 如護法許老所講, 每個人講話都有目的.......
好戲真係一場接一場, 睇來係時候謝幕, 至少俾na個胃歇一歇........
December 30 狀元記者看報紙見到某報業集團的招聘廣告, 當中包括招聘優才記者100名, 見習記者100名. na好奇何謂優才記者, 同一般記者, 又或者呢個集團同時聘請的見習記者有何分別?
看看入職要求, 原來見習記者只係簡單要求大專畢業, 而優才記者, 就必須要本地知名或海外大學畢業, 仲要A-level考獲三科A或以上, 又或者會考七條A或以上, 即係話, 要請狀元!! 狀元當記者, 人工仲相當可觀, 三個月培訓期內, 月薪可高達一萬八千大元, 培訓後更可達二萬八咁話. 至於無A傍身的見習記者, 入職薪金一萬元, 培訓後都係多兩千........無怪乎現役記者, 即使打生打死, 一個頂十個, 人工都係咁奀, 只因我們當中無幾多個係狀元!!
真係好質疑, 狀元係咪一定通曉時事, 一定具有新聞觸角, 具有使命感, 一定夠批判, 夠客觀, 識執生, 一定有社會責任?? 唔係要睇低狀元, 只係總不能將一紙文憑同以上種種劃上等號! 好似高中狀元, 就做乜都得!
記得呢個報業集團, 過往會考都做過甚麼"高分低能"的報道, 或許如今他們"知錯了"!!
December 26 海嘯一周年記得一年前的今天, 跟往常一樣的上班, 這些年來, 大時大節或者公眾假期, 總不能避免在工作中渡過.........到了接近中午專輯時間, 外電忽然傳來印尼八點七級地震的消息, 各同事機械式地寫稿, 放上網, 找華人.........當時沒有人意識到, 這一場會是世紀災難!
接著的日子, 每天看著海嘯沖擊一刻, 叫人驚心動魄的畫面; 每天看著原本好端端的渡假天堂, 變成人間地獄, 被蹂躪得體無完膚; 原本在這裡的人, 很多一時間不知哪裡去了......更多人在無助的尋找.........
周遭瀰漫著低氣壓......縱使一樣的忙, 可能更忙, 但這期間, newsroom少有的"沉默"!
一年後的今天, 人們可還記得這場災難? 記得當中的種種? 還會記掛遇難破碎的家庭嗎? 忘了沒打緊, 傳媒總會為你"溫故", 也會讓你"知新". 製作甚麼甚麼一周年, 這些年來, 似乎已是指定動作, 管它該做不該做, 總之人有我有! 當然不是說今次海嘯一周年不該做, 只是叫人感觸, 若非一周年, 大家會再關心當天受災的一群嗎?
為追新聞, 大家可有感到自己有時很無情? 為趕死線, 大家可有覺得自己有時麻木不仁? 即使有人在你面前呼天搶地, 心中可能只想著如何取得一個所謂touching的sound bite, 之後盡快報料和傳送. 或許真的動容了, 但那時那刻, 相信大家也只能硬起心腸.......身不由己! 像是借口, 也是現實!
一年又將過去, 明年今日還會是這樣嗎?
冰上聖誕得大家提醒, 知道要update Blog喇.......這個星期真係相當忙, 忙"紅杏出牆", 忙政改, 又忙包罐頭, 應酬香港"聖誕檔期". 唉! 仲要以親善大使身份壓場, 協調各台阿姐, 煩到呢.......最終今日先可以安安樂樂放到一日假!!
一早就出外行公園, na真係越來越似亞婆! 點都好, 真係要出去伸展下, 唔係副老骨頭, 或者賤骨頭, 可能會散......下晝就同大伙去咗什剎海滑冰.
雖說滑冰, 但na無租到滑冰鞋, 因為怕跌, 都話副骨頭脆, 唔多襟跌, so.......na租咗架"輪椅", 由四腳挨pan櫈改裝成雪橇模樣的"輪椅", 好有體育精神咁參與呢場運動!! 唔好以為na全程都坐, 由其他人推, 錯喇! 因為著住滑冰鞋, 唔代表可以行可以走, 佢地都要靠推住na, 先可以平衡得到, 更多時, 係由na去推初學者. 有嘢扶住, 只要踼起腳跑, 原來都可以在冰上走動得好自如! 係咁跑係咁跑, 都真係相當夠運動量, 好過行公園!!
坐"輪椅"亦相當刺激! 有"駕駛者"就平衡唔到, 失控將na連人帶車360度轉, 嚇到呢........之後又有"駕駛者"將坐在"輪椅"上的na, 盲中中推向一個滑行中的小朋友, 為免撞低小朋友, na扭身翻咗出車, 右邊patpat鋤咗落冰面, 痛到.......不過patpat最終無傷到, 可能因為肉厚, 但係扭傷咗右邊大脾, 家下時仲隱隱作痛! 散場後, 運動健兒中竟有人說"下周再來", 要學識為止, 咁有毅力, 都算好事, 值得鼓勵! 不過, 唔好諗住搵我做"扶手"........
December 18 願與你們同在真係無辦法瞓得著, 關心住香港情況, 更擔心前線的同事及友好.......
透過手機短信, 知道同事正在寒風中顫抖, 仲要未食飯......很不好過!! 只能在遠方精神支持!
凌晨時份, 終於能夠登入cable news, 雖然有聲無畫, 但經已感動到不得了......警方現正清場, 似乎過程順利, 希望盡早收拾殘局, 恢復秩序, 亦可讓na的同事及友好回家休息!
希望大家都沒有受傷!! 你地好勁呀! 撐住!
消息封鎖好激氣!! 明知香港好大鑊, 但掌握唔到情況, 因為無法聽到或睇到任何有關的新聞.......
多謝小蓓下晝率先告知在街外的na, 香港"出事喇", 仲融合各台的消息, 透過電話做埋live, 報道示威者同警方衝突, 警方出水砲(其後了解只係消防開喉射水), 示威者在灣仔四散, 灣仔地鐵封咗, 警方仲叫人唔好去灣仔.......總之好大鑊!
當na返回辦公室, 急不及待上網睇cable, 可恨多次都係"找不到伺服器".......唔好玩啦! na今日真係好需要睇新聞!!! 過去在北京, 都係倚賴睇cable了解香港消息, 因為兩個電台的網站早就block咗; tvb時上到時上唔到, 早前裝咗個tvants, 可以聽到本台, 可惜聽咗幾日, 隻蟻都死埋.......真係趕到na好絕! 連CNN同BBC都播緊其他新聞, 心情真係唔知點形容......想喊咁滯!
最後na都係"求助"cable, 去佢地辦公室睇電視, 因為佢地有隻鑊加埋解碼器, 可以用廿九吋大電視睇, 不過經已九點幾, 都真係唔係幾好意思, 阻住人休息(記者作病要瞓, 多謝攝影小方招呼), 睇咗個半鐘左右, 一直都係直播, 警方又唔清場, 已過十一點, na都不唔好意思再坐, 但起碼掌握到一點情況, 如果有roundup就更好, 家下都只係知道對歭........甚麼推警車, 施放催淚彈, 胡椒粉彈, 都係聽anchor嗡!
心裡面真係咩粗口都出齊!!! 家下實情咩年代, 竟然可以身處一個唔係落後到無飯開的地方, 但係對外界消息可以無從掌握.......我知道, 我今晚唔會瞓得著!
December 16 隔岸觀火每日只能睇住cable在電腦屏幕上"窒窒下", 甚至停留不動的畫面, 了解世貿會場外的最新戰況, 真係好無癮......有得睇, 無得做, 對na呢個放假都會睇電視記者會直播的人來講, 簡直係懲罰!
無可否認, 我犯賤!
但呢類示威場面, 真係有幾可? 作為記者點能夠錯過呢? 經歷, 會係一番體會.........間中傳來同事的手機短信, "示威農民正殺向示威區, 我要帶上大頭仔應戰喇!", 聽著同事一節又一節的直播報道, 心癢身更癢, 好想現身鴻興道, 同大家並肩作戰!!
今天友台記者被抽調返香港, 因為未來兩天香港要增援, 不單駐京要執包袱搭飛機, 駐廣州的記者亦要著草搭直通車返港報到.......今早例行跟採主通電話, 經已連續多日, 劈頭就聽到"你就好啦......", 當然知佢講笑, 但係na唔講得笑, 終於忍唔住駁咀! "究竟有幾好? 我都想幫手, 你要人, 講一句, 即刻飛返嚟, 下晝埋位!!! " 當然, 口舌招尤一輪, 咪又係繼續留守京城......
記得香港首次七一遊行, 亦正係na首次駐京, 同當時官台駐京記者, 現役姊妹台的黃太一齊聽住本台直播(嗰時未識睇cable), 一樣心癢癢, 有幾可可以激發幾十萬人上街抗爭......當日正值星期二, 為苦中作樂, 兩個傻人仲話要自製橫額, 由辦公室遊行前往外交部(當天有例行記者會), 最後當然得個講字!
今次黃太就可以衝鋒陷陣, 體會香港少見的示威場面, 仲在鏡頭前上演埋"人雞大戰", 真係唔講得笑! 恭喜!! 而na, 又一次錯過了......
或許na得適應一下, 尤其正面對工作轉型, 唔能夠下下沉醉在前線衝呀衝, 該尋找一下大後方的滿足感!
站在前線的各位, 未來兩日可能仲甘, 大家注意安全, 特別係站在最前最前線的一群!! na在遠方支持你哋! 你哋呢幾日做得好好, 真的! 加油!!!
December 13 風繼續吹這幾天不停玩"飄移"......真係好大風, 連日來北京都吹住五六級風, 真係頭都甩, 無辦法行到直線, 總係被風由左吹到右, 又由右吹到左, 有時行出公寓大門的一百米路, 都舉步維艱! 好吃力!!
na幾乎都唔想行出門口, 總覺得好凍! 記得上次冬天駐京, 沒有這個感覺......攪不清楚, 究竟係北京呢個冬天真係份外凍, 定係na確實孱咗?
氣象台預測, 未來幾日, 風繼續吹甩髻, 明天氣溫介乎零下二度至零下九度......諗起都打冷震!
December 11 礦難何時了......仍然流住兩倘鼻涕, 幸好原先腫腫哋的手指關節, 經已回復正常, 至少可以繼續打字打到"啪啪聲".......攪到咁, 因為早幾日去咗唐山採訪礦難!
天寒地又凍的周三晚上, 還在打電話聯繫一些工作, 攪到飯都未食, 只係飲咗湯, 更加唔好講我最鍾意的夜間節目---洗白白! 就喺呢個時候, 忽然收到唐山發生礦難, 於是三扒兩撥, 將可以著上身的衫都著哂佢, 就行人喇!
去到唐山, 通宵穿梭各間醫院搵傷者, 當時香港同事通知, 煤礦發生爆炸後, 救出咗一百一十人, 但係間間醫院都死寂咁, 人影都唔見, 鬼影可能有, 可幸我時運高......仲好彩到喺某間醫院, 先後撞番哂所有行家, 真係齊齊整整! 亦都喺呢間醫院, 逐層搜索下, 搵到一批燒傷的礦工, 不過人太多, 太揚, 最終做唔到訪問, 只見班礦工燒到皮開肉裂, 見到都覺得好痛! 此時有行家將人家燒傷的身軀來開玩笑, na又忍唔住鬧人!!
趁天未光, 大家決定再潛番去礦場(到埗時"辣"過一轉), 因為相信天光後保安會無咁鬆懈, 屆時想入都入唔到. 四周圍黑到伸手不見五指, 仲好凍~~~~~~到天光先知, 原來身後一大片荒廢農地, 都鋪滿雪咁滯, 唔怪得腳底凍到又赤又痛, 手指都僵硬, 帶上兩對手套都無用! 某電視台攝影借出"咖啦底"俾na雙手取暖, 無奈作用唔大......都仲係自己個"咖啦底"好駛, 因為可以除去手套, 直接將手深入幾層衣服入面, 套取體溫! 雙手暖番, 先再帶手套. 不過實情唔夠一陣, 雙手又會凍僵, 只係總好過由得佢, 凍到手指頭壞死咁點算? 如果雙腳都可以做到呢個高難度動作, na都唔介意核突, 呢D時候, 真係唔可以講儀態!!
天開始光, 就陸續有人來到礦場, 相信係礦工家屬, 但係周圍好多公安, 不宜輕舉妄動! 到後來, 有家屬用身擋住由礦場駛出的車, 喊到呼天搶地, 大家先一湧而上.......家屬都好無助, 好多人亦作咗最壞打算, 只係, 係生係死, 都想得個明白, 事實, 咁樣的要求一D都唔過份! 點解仲要推撞佢地? 點解仲要喝令佢地收聲? 佢地無做錯事, 最多可能係佢地屋企人信錯人, 行錯路, 走咗入礦場, 攪到一去不返, 不辭而別.......最後呢批激動的親屬都被人用車送走, 呢D都係內地慣用的手法, 唔想"醜事"張揚! 實情, 唔醜就唔駛遮醜啦!! 最氣憤仲係, 見到一群睇熱鬧的塘邊鶴, 見到人家咁悽涼, 仲喺度笑, 當睇鬧劇, 真係想打巴佢!!!
當局聲稱, 死難者親屬都可以依法獲二十萬人民幣的賠償. 可能因為今次呢單嘢好揚吓, 所以後來仲話加碼到廿二萬添. 不過, 最終親屬係咪真係可以收到賠償呢? 如果監管煤礦安全都做唔到, 攪到一年死咁多人, 都唔知點相信, 賠償保証可以到度親屬手.......當然, 事故張揚咗, 都仲可以講"法", 以往就曾經聽過, 一D小事故, 礦主扐出一兩萬, 就打發咗死難者親屬, 當無事發生過, 繼續攞人地條命去博.......
今天經過北京某商場的名店, 看著一個標價一萬八千大元的手袋........
December 09 由此路進終於的起心肝, 建立自己的網誌!
na雖自閉, 但不麻木, 總有很多想法, 在腦袋裡團團轉, 也得為"它們"尋找出路; 我的工作叫我看到很多, 但年紀漸長, 記憶力漸衰, 經歷過的, 感受過的, 隨時間變得模糊, 有點不值, 還是找個空間, 公開心情吧!
若有興趣分享na的所見所聞, 所感所想, 請由此路進>>>>>>
p.s 正想按"發佈"的時候, 街外傳來bebu聲, 本能反應有事發生, 希望非大大鑊, 無用"著草"啦!
|
|
|
